كعادتى كل عام يرسل سموى حفظنى الله برقية تهنئة بالعيد لعامة الشعب

انا اتخميت

ايوة

كنت عمال افكر قبل الاجازة

و اقول انشاء الله مصر تبدأ رمضان قبل السعوديه

كده يبقي انا هصوم اقل من الناس في مصر بيوم

لاني هكمل معاهم و اعيد معاهم

مش معقول هصوم و هما يعيدو

اوم ايه الشويفه الي في السعوديه

يبدأو بدري يوم و الموضوع يتقلب

يا خبر ابيض

ايوة ده حصل و اليوم هو بالنسبه لي 31 رمضان

و انقلب السحر علي الساحر

و طباخ السم لازم يدوقو

حلوان لندن مباشر بشرط خلع النقاب

حاجه تحرق الدم هو مفيش رمضان يعدي من غير يا حرب يا قلة ادب

رئيس جامعة حلوان يمنع الطالبات من الدخول بالنقاب
ليه؟ علشان نعرف مين الي داخل و الي خارج
يعني كنا نيمين خمسن سنه و مكتشفناش المشكله دي الا حالا؟

اكتر حاجه في حياتي بتعصبني هي معالجه المشكله بالمنع
النقاب بيعمل مشاكل نمنع النقاب و بكده نكون حلينا المشكله يا سلام

و التاني سترو الي عاوز يلمع نفسه و طبعا اسهل حاجه
يمشي علي الموضه و الموضه اليومين دول المسلمين

راجعين يا هوى راجعين

راجعين يا هوى راجعين

يا زهرة المساكين

راجعين يا هوى على دار الهوى

على نار الهوى راجعين

اجاااااااااااااااازة ياعالم
اجااااااااااااااازة ياهو
راجع مصر ان شاء الله مش عارف هعرف اكتب خلال الاجازة و لا مش هعرف
ربنا يسهل و تعدي السفريه من غير تأخير ولا حبشتكنات ان شاء الله

يـــــــا رب

الرياض اول مره

اخبار كويسه وصلتني علي الميل فيه فرصه لحضور كورس لشخصين
لكن الحلو ميكملش الكورس في الرياض طيب نحاول و نشوف

خلاص الحلو كمل و هنسافر انا و المدير

اول مره سفر للرياض خمسه دعبسه علي موقع الخطوط السعوديه لقيت اني ممكن احجز من علي الموقع و الي معاه فيزا ممكن يدفع و التذكره توصله لحد عنده
مقارنه سريعه بين الموقع و موقع مصر للطيران تخلي الواحد عاوز يقول كلام مش كويس المهم

انا كده ممكن اضرب 3 عصافير بحجر احضر الكورس اشوف خالي و اشوف سعد
سعد هو واحد صاحبي من ايام الكليه و عشرة اربع سنين و مدينه و بيات عند بعض و سفر و مذاكره
و عندو ولع شديد بالخيار بيحب ياكل خيار كتير و علشان كده كان اسم الشهره سعد خياره او خياره

المهم خلاص هنسافر يوم الجمعه علي طيارة 7.30 بالليل نوصل علي الساعه 10 او 10.30 نشوف سكن او فندق و ننام علي الساعه 12 علشان تاني يوم نروح بدري و مصحصحين تمام؟ تمام
يبقي نتحرك من البيت علي الساعه 6 حتي الان كله 100%

من 5.45 جاهز و مستني لكن متحركناش من البيت الا الساعه 6.30 ووصلنا المطار 7
هبا الحق الطياره قفلت و بعدين
انزل تحت خد دور في الانتظارو بعدين في البهدله دي اخدنا دور

الطياره الي بعد كده الساعه 9 معرفناش نركب علشان دورنا بعيد مركبناش الا طياره 3 الفجر
وصلنا الساعه 5 يوم السبت علي ما رحنا السكن وكانت الساعه 7 دش بسرعه و فطار وصلنا الكورس الساعه 8.30 علي الميعاد مظبوط

واحد نسكافيه كبير علشان افوق لكن مفيش فايده
الراجل بيتكلم في حجات كويسه و عاوز افهمها لكن كل شويه عمال افئر

المهم اليوم خلص روحت نوم طبعا علي طول
يومين و رحت لخالي عزمني علي العشا محشي ياه من 8 شهور مكلتش محشي
تاني يوم قابلت سعد طبعا سبحان الله مين كان يصدق من النحال "اسم المبني الي كنا فيه في المدينه الجامعيه"
ل العلايا و المملكه و الفيصليه

سعد حالو مكنش ولا بد ربنا يعينه بس طبعا كان فرحان ان احنا اتقابلنا
رحلة العوده عملنا بالمثل الي بيقول الي يتلسع من الشربه ينفخ في الزبادي
ميعاد الطياره الساعه 10 باليل كنا في المطار الساعه 8.15
و لسان حلنا بيقول استني ساعه بكيفك ولا تستناش 7 ساعات غصب عنك

لكن الفاجئه الكبيره الحجز ملغي يا شطار ايه يعني ايه ملغي
انتو اتأخرتو علي رحلة الذهاب و كان المفروض تعيدو الحجز تاني لان الي بيتأخر حجزه بيتلغي
يعني ايه احنا محدش بلغنا و الموظف الي ركبنا علي رحله بعد كده منبهناش ليه؟
مفيش فايده روح خد دور في الانتظار. تاني!!!

لكن المره دي كان يوم اربع و الخميس و الجمعه
اغلب الناس هنا اجازة و السبت كان اليوم الوطني اجازة برضو
يعني يا حلو المطار زحمه و الناس كلها ريحه و جايه علي جده
و النتيجه ان احنا نمنا في مسجد المطار و مركبناش الا طياره 9.30 تاني يوم الصبح !!!

ودي كانت اول مره اسافر الرياض و اول مره اتأخر علي طياره و ان شاء الله هتكون اخر مره

حلم جميل من أحلام الأطفال

ايوه يا ما يا حبيبتى
منتى شكلتى ملامحى من زمان
لما كان العمر بذره
اه يا بحر من الحنان
كنت حاسس بين ايديكى
انى وانتى ظغننين
كنت بشعر بالامان
تحدفينى هُبّه فوق
القى قلبك
نصه لهفه ونصه شوق
اندفن جوه في حضنك
وانتى مستنيه اضحك وابتسم
لجل كل طريق في عمرك يترسم
كنت اشوفنى ف ننى عينك
القى نفسى بقيت كبير

منقول من
http://www.haridy.com/cms2/content/view/90/2/

Welcome Back Dial Up

ركبت تليفون يا جماعه
عملتها ودي اول ساعه نت من البيت مش من الشغل
طبعا اول حاجه بعد ما كله بقي تمام قلت اكتب بلج
صحيح انا داخل

dial up

و انا كنت نسيت الموضوع ده من 3 سنين لكن مش مشكله

الجميل في الموضوع انه ببلااااااااش
ايوة هو هنا اسمه هاتف بس برضو مش مشكله
رسوم التأسيس 300 ريال لكن في رمضان بتكون مجانا
و ابو بلاش كتر منه بفكر اقدم علي تليفون كمان

:))

الاجمل انك تتصل ب 907 و ياخد منك البيانات تاني يوم يبعتو فني يركب الخط
الي مش جميل اوي انه بيركب الخط في الكبينه في الشارع بس مبيوصلوش البيت
و مفيش عده تليفون زي الي المصريه للاتصالات بتقدمها
الفني بيركب الخط و الباقي عليك

اشتريت لفة سلك و قلت العده ملهاش لزمه انا هوصل الخط في الكمبيوتر
و مش هحتاج العدة و قد كان
صحيح اتبهدلت علي ما وصلت السلك من الكبينه
ل البيت بس ارجع و اقول برضو مش مشكله

و استغليت الي معايا في السكن واحد تحت في الشارع
و واحد زنهار عند الشباك علشان ياخد السلك وواحد معايا علي السطح و المودم من اخر واحد
يبقي انا كده قضتها 100% سنكحه الف شكر يارجاله نتعبكم يوم فرحي ان شاء الله

لذيذه اوي الحجات الي ببلاش دي

:))