اما, ماما, امي
عندي حجات كتير عاوز اكتبها و اطلعها
لكن الموضوع ده فرض نفسه و معرفتش ابدأ باي حاجه غيره
فلاش باك
يوم في سنة 2000
كنت جوه في الاوضه بفتكس علي الكمبيورت
انده بصوت عالي من الاوضه امي عاوز شاي
اكمل افتكاس علي الجهاز و تعدي نص ساعه
باب الاوضه كان متوارب افتح الباب و انده اين الشاي يا امي؟
صوت يظهر فجأة من خلفي في الصاله
الله الله هتاف و تصفيق
ايه انت هني من امتي يا استاذ ؟
(ده استاذ العربي الي كان بيجي سعات ل اخويا في البيت كان لاسع شويه لانه دخل المعتقل كام سنه)
ايه يا ابني الحلاوه
الله يخليك يا استاذ (انا مبتسما)
في الاخر عملت الشاي لنفسي
ايام الكليه و الجيش عودتني علي حاجه جميله اوي
من و انا صغير متعودتش ابوس اديها و محدش في عيلتنا تقريبا كان بيبوس ايد امه
لما سافرت للكليه معظم اصحابي الي عرفتهم كان فيهم ناس بيبوسو ايد ابوهم
قلت في بالي هما يعني احسن مني صحيح كنت بتكسف في الاول و هي كمان مكنتش متعوده بس قلت لازم
و في يوم و انا نازل يوم الجمعه بالليل حضرت الشنطه و يلا سلام يا ماما سلام يا حبيبي سلمت عليها و بست اديها علي السريع
بعد كده اتعودت و بدأ اخويا كمان
اصعب موقف عدي عليا كان في العيد الصغير الي فات كان اول عيد يعدي علي هنا
خارج من الجامع بعد الصلاه لقيت واحد زميلنا بيته في وش الجامع بيسلم علي ابوة و بيبوس ايده
المشهد ده مش قادر انساه و يمكن كمان مش قادر اوصف احساسي بيه حتي بعد ما فات سنه تقريبا
لان كان نفسي اكون جمبها في العيد و ابوس اديها و اقلها كل سنه و انتي طيبه
كل الي اقدر اعمله اني اكلمها علي الموبيل
طيب ليه ده كله؟
لانها عملت كتير اوي علشاني انا و اخويا ده مش كلام انشه او موضوع تعبير ده بجد
هي اتجوزت ابويا و هي في 2 كليه يعني تقريبا 20-21 سنه
عاشت سنتين معاه مش حامله هم للدنيه طبيب مشهور و محبوب من كل الناس مفيش اي مشاكل ماديه كل التوقعات ان الي جاي احسن
فجأة توفي
يعني واحده عندها 22-23 سنه و معاها عيل و التاني في الطريق
طبعا الجواز اثر علي دراستها بس كملت و اتخرجت و دورت علي شغل و اشتغلت و ربة العيال و رفضت الجواز تاني
لما كنت في ثانوي و بدأت افهم شويه هي ايه الي عملته بالظبت
و الله كنت كل يوم ادعي انها تتجوز علشان ترتاح
ترتاح من القلق اهم حاجه لكن هي عمرها مهترتاح من القلق علينا
مهما اتكلمت مفيش كلام يوصف الي جوايا
ديما مبنعرفش قيمه الحاجه الا لما تروح مننا او تبعد بس انا كنت عارف قيمتها من قبل ما ابعد و اسافر
وانا مسافر اول مره لهنا كانت بتسلم علي و هي "مسبهله"
فرحه + حزن في نفس الوقت
فرحه علشان الشغل و السفر
حزن علشان السلام ده مش زي السلامات الي فاتت الي كان اخرها اسبوعين بالكتير تلاته و ارجع تاني
posted by KazaBaza @ 9:39 PM
15 comments
15 Comments:
I can understand what you are saying?
Isn't it weired that we never feel the important of parents unless we start loosing them
ياه
كلامك بيدخل القلب كدة
انا كمان امى عظيمة جدا -ربنا يخليهالى يارب- ومش بعرف اعبر
اول مرة بوست اديها كنت مستعبطانى قوى،، اللى هو واحدة مهندسة وتبوس ايد حد
بس دلوقتىبتمنى فى اى لحظة اوطى وأبوس اديها
يااااااااه
تسافر وترجع لامك بالسلامة
أنا حاسة بالكلام ده اوي ماما دي أغلى حاجة في حياتي لأ هي أصلا كل حياتي عارف أنا بقيت عايزة أراقبها و هي بتضحك و هي بتهزر و هي بتتكلم عارف كمان أنا من زمان و أنا بفكر لو ماما جرالها حاجة ممكن يحصلي ايه يا ريت أموت قبلها
و كمان مش عايزة اكبر و اتجوز عشان مبعدش عنها
هي كمان ضحت كتبر قوي لدرجة اني مش متخيلة أصلا ان انسان ممكن يعمل اللي هي عملته
ربنا يخليهالك
خالص تحياتي لامك و امي و ام كل البلوجرية
ahmos
يمكن علشان اتعودنا ديما علي وجدهم في حياتنا فمبنحسش بالموضوع الا لما نفقدهم جزئيا او كليا
lasto-adri
علشان طالع من القلب برضو (:
بس انتي مش بتبوسي ايد "حد" دي امك
فالموضوع مش موضوع كليات هنا
شكرا علي الدعاء
zanoubia
ربنا يخليهالك يارب
حاولي توصليلها احساسك ده
باي طريقه مش شرط البوس يعني
انا سعات كنت بجبلها اي حاجه عارف انها بتحبها
morro مثلا
او واحد شاي يتعملها علي سهوه كده و تلاقيه بيتقدملها
كلبوزة
شاكرين لكم تحياتكم
مش ناويه تغيري القطه دي من باب النيو
لوك يعني
واضح انك انسان محترم
ربنا يخليلك مامتك وماماتنا كلنا ويديهم الصحه
tona
شكرا ده بس من زوقك
اخجلتم تواضعنا
اغير القطة و احط اية؟
فار
سلمت علي مامتك؟
قولها كلبوزة بتقولك ربنا يديلك الصحة
كلبوزه
فار !!
لا خلاص خلينا في القطط مش مشكله
يوصل السلام ان شاء الله
ابراهيم
امين يا رب
حاجه ساقعه بسرعه للدكتور علشان الدعوتين الجمدين دول
نجيب حاجه للحصان بالمره ؟
نحن نوصل الكشري الي المدونات
و واحد نقاوة للست الوالدة
و الرز بلبن عليك
:)
كلبوزه
ايه الخدمات الجامده دي
اتنبأ لكي بمستقبل باهر في الموضوع ده
و باهر هنشفله اي حاجه تانيه يعملها
ضحكتيني علي الصبح
:))
انا كمان قعدت عمري كله نفسي اوي ابوس ايد امي لكن كنت بتكسف جدا واقول طب ازاي اجي كده لوحدي واخد ايدها ابوسها يا شيخة اعقلي - على قد ما حضنها كان واسع ودافي وبيلم كل حزني واحباطي - المهم اول مرة جت لي الشجاعه اني ابوس فيها ايدها كانت تعبانه اوي ومش حاسه بيه حسيت باحساس مينفعش توصفه غير الدموع اللي مغرقه الكيورد قدامي دلوقت
حبيت اقولك واقولكم كلكم ممكن تقولي لكل الناس اللي بتحبوهم انكم بتحبوهم دلقوت قبل اي لحظة تانية مش عارفين هنكون فيه قريبين ولا بعاد
موجودين ولا مشينا
كراكيب نهى على فكرة بحبك أوي يا ماما
كراكيب نهي
ربنا يشفيها و يخليهالك
"
حبيت اقولك واقولكم كلكم ممكن تقولي لكل الناس اللي بتحبوهم انكم بتحبوهم دلوقت قبل اي لحظة تانية مش عارفين هنكون فيه قريبين ولا بعاد
موجودين ولا مشينا
"
عندك حق في كل كلمه
بس الكسوف في الحجات دي عمره ما بينفع
نهي
انا لسه فاتح البلوج بتاعك حالا
اعتقد ان تعليقي مكنش مناسب
بس برضو انتي تقدري تبريها
"
و لد صالح يدعو له
"
ولد صالح يدعو له
ومش بس كده هي معايا في كل لحظة جوايا اوي كمان متشكره على زيارتك كراكيبي المتواضعه
كراكيب نهى
Post a Comment
<< Home